امام علی رحمان، رئیس جمهور تاجیکستان در دیدار با عبدالله عبدالله، رئیس شورای مصالحه ملی افغانستان، در شهر دوشنبه گفت: «ما خواهان تامین صلح و ثبات در افغانستان هستیم، زیرا افغانستان و تاجیکستان و منطقه از دهشت‌افکنی، افراط‌گرایی و بی‌ثباتی متضرر شده‌اند.»
آقای رحمان حمایت دولتش را از روند صلح جاری در افغانستان اعلام کرد و گفت: «تاجیکستان از روند صلح در افغانستان حمایت می‌کند، چون صلح و ثبات در افغانستان صلح و ثبات در تاجیکستان، منطقه و فراتر از منطقه است.»
امام علی رحمان، تاکید کرد: «افغانستان، تاجیکستان و منطقه از دهشت‌افکنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه گسترش و توسعه تجارت و ترانزیت میان دو کشور منطقه و اتصال آسیای مرکزی به جنوب آسیا را فراهم می‌سازد.»
رئیس جمهور تاجیکستان افزود: «تاجیکستان دوست و متحد افغانستان است و از تلاش‌های صلح در این کشور و تصمیم جمهوری اسلامی و مردم افغانستان حمایت می‌کند.»
در این دیدار عبدالله عبدالله، رئیس شورای مصالحه ملی افغانستان نیز گفت: «روابط و دوستی میان افغانستان و تاجیکستان بر ارزش‌ها و مشترکات تاریخی، فرهنگی و دینی دیرینه استوار است و از حمایت و همکاری‌های تاجیکستان از داعیه برحق مردم افغانستان در دوره‌های مختلف سپاسگزاریم.»
Read More
This section contains relevant reference points, placed in (Inner related node field)
آقای عبدالله عبدالله، نقش تاجیکستان را در تامین صلح و ثبات در افغانستان مهم خواند و افزود: «دولت افغانستان در مذاکرات صلح به دست‌یافتن به صلح پایدار، عادلانه با عزت و با حفظ ارزش‌های جمهوریت متعهد است.»
او تاکید کرد: «دولت و مردم افغانستان از جنگ خسته شده‌اند و می‌خواهند که جنگ و خون‌ریزی خاتمه پیدا کند.»
قاهر رسول‌زاده، صدراعظم جمهوری تاجیکستان نیز در دیدار با عبدالله عبدالله و همراهانش، حمایت کشورش را از روند صلح کنونی در افغانستان اعلام کرد و گفت: «افغانستان از دوستان و متحدان تاجیکستان است و روابط میان دو کشور حسنه است. ما از روند صلح در افغانستان حمایت می‌کنیم و صلح و ثبات را در افغانستان، صلح و ثبات در تاجیکستان و منطقه می‌دانیم.»
آقای رسول‌زاده، به عبدالله عبدالله گفت: «آرزو داریم که تلاش‌های صلح به رهبری شما نتیجه بدهد و تاجیکستان نیز همکاری‌هایش را در این زمینه ادامه می‌دهد.»
در همین حال، محمد طاهر ذاکرزاده، رئیس مجلس نمایندگان تاجیکستان نیز حمایتش را از روند صلح به رهبری عبدالله عبدالله، اعلام و از آن حمایت کرد.
آقای ذاکرزاده، گفت: «تاجیکستان روابط نیک و خوب با افغانستان دارد. صلح و ثبات در افغانستان به نفع صلح، ثبات، ترقی و توسعه در منطقه است.»
صمد جاوید، یک کارشناس سیاسی افغان می‌گوید: «بدون شک سفرهای آقای عبدالله عبدالله، به کشورهای همسایه و منطقه خیلی با ارزش است، چون با شخصیتی که آقای عبدالله دارد می‌تواند به روند صلح کمک کند. خواست ما از رئیس شورای مصالحه ملی این است که در دیدارهایش با بزرگان کشورهای همسایه افغانستان، رُک و راست صحبت کند و آن چه که واقعیت است بگوید و از آنان نیز بشنود تا مشکلاتی را که فرا راه روند صلح است تا آغاز روند دوم مذاکرات برداشته و روند صلح هرچه زودتر به نتیجه برسد.»
اجمل صدیقی، یک کارشناس سیاسی دیگر گفت: «سفرهای رئیس شورای مصالحه ملی به کشورهای همسایه افغانستان مهم و دیدگاه و نظریات دولتمردان آن کشورها در رابطه با صلح کنونی و چگونگی حمایت‌شان مهم‌تر. برای آوردن صلح در افغانستان و ختم جنگ از این کشور اگر اجماع بیرونی به ویژه کشورهایی که با افغانستان همسایه هستند به وجود نیاید مشکل خواهد بود که صلح به تنهایی و حمایت و مدیریت چند کشور محدود که آن هم همسایه‌های ما نباشد تامین شود.»
