صادق امامی، معاون وزارت خارجه تاجیکستان، در نشست سازمان امنیت و همکاری اروپا، که روز پنجشنبه ۹ آذر در شهر اسکوپیه در مقدونیه برگزار شد، گفت که به‌علت وخامت اوضاع امنیتی در افغانستان و تهدیدهای ناشی از تروریسم و قاچاق مواد مخدر در مرزهای آن کشور با آسیای مرکزی، تاجیکستان خواستار حمایت و همکاری کشورهای عضو سازمان امنیت و همکاری اروپا و جامعه جهانی است.

اسپوتنیک به‌نقل از صادق امامی نوشت: «اوضاع نظامی و سیاسی افغانستان بر امنیت آسیای میانه اثر می‌گذارد. در مناطق شمالی آن کشور، فعالیت گروه‌های تروریستی و قاچاق غیرقانونی سلاح و مواد مخدر وجود دارد و به همین دلیل، این چالش‌ها در آینده نزدیک ممکن است به منبع اصلی اضطراب در منطقه کشورهای عضو سازمان منیت و همکاری اروپا تبدیل شود.»

تاجیکستان، که حدود یک‌هزار و ۳۰۰ کیلومتر مرز مشترک با افغانستان دارد، در دو سال سلطه طالبان بر این کشور همواره از گسترش فعالیت سازمان‌های تروریستی، از جمله داعش خراسان در شمال افغانستان، ابراز نگرانی کرده است.

در این مدت، یک بار داعش خراسان از خاک افغانستان به خاک تاجیکستان راکت شلیک کرد و یک بار نیز  چهار تن از اعضای جماعت انصارالله با عبور از مرز وارد خاک تاجیکستان شدند و در درگیری با نیروهای تاجیکستانی کشته شدند.

همچنین، در این مدت، مرزبانان تاجیکستان چند بار با قاچاق‌بران اسلحه و مواد مخدر درگیر شده‌اند. در اردیبهشت امسال، کامران رجب‌زاده، از فرماندهان ارشد نیروی مرزی آن کشور، در درگیری با قاچاقچیان کشته شدند.

معاون وزارت خارجه تاجیکستان با اشاره به نگرانی‌های امنیتی کشورش از فعالیت گروه‌های تروریستی و شبکه‌های تبهکار در مرز افغانستان با تاجیکستان گفت: «در این شرایط، کشور من نگهبانی از مرزها و توان مدیریت مرزهایش را در اولویت قرار خواهد داد.»

این مقام تاجیکستانی همچنین از تلاش‌های کشورش به‌منظور جلب حمایت جهان برای همکاری در حوزه کمک به امنیت و ثبات در مرزهای تاجیکستان با افغانستان خبر داد و گفت در پنج سال گذشته، تاجیکستان با همکاری سازمان ملل متحد و سازمان امنیت و همکاری اروپا و اتحادیه اروپا مجموعه‌‌ای از کنفرانس‌های بین‌المللی برگزار کرده و جامعه جهانی را به روند ضدتروریسم تاجیکستان جذب کرده است.

در میان کشورهای آسیای مرکزی، تاجیکستان تنها کشوری است که روابط آشکار با رژیم طالبان برقرار نکرده است و از تعامل بدون قید و شرط با طالبان نیز حمایت نمی‌کند. امامعلی رحمان، رئیس‌جمهوری تاجیکستان، در دو سال گذشته بارها بر تشکیل دولت فراگیر با حضور همه اقوام و اقشار افغانستان تاکید کرده است. او در سال ۲۰۲۱، در نشست مجمع عمومی سازمان ملل متحد در نیویورک، گفت تا زمانی که دولت فراگیر و قانونی در افغانستان شکل نگیرد، هیچ ساختاری را در آن کشور به رسمیت نمی‌شناسد.

تاجیکستان نگران است که حاکمیت طالبان در افغانستان منجر به ترویج افکار تندروانه در آسیای مرکزی و تقویت گروه‌های تروریستی بین‌المللی در این کشور شود. جماعت انصارالله، گروه تروریستی مستقر در افغانستان که از شهروندان تاجیکستان تشکیل شده است، در بدخشان افغانستان و در مرز با تاجیکستان مستقر است. این گروه، به رهبری مهدی ارسلان، از متحدان دیرینه طالبان است و از حمایت رهبران این گروه برخوردار است.