نشست دو روزه سازمان پیمان امنیت جمعی در روزهای ۲۰ و ۲۱ دسامبر در شهر دوشنبه، پایتخت تاجیکستان، برگزار شد. شرکت‌کنندگان در این نشست خواستار تقویت مرز تاجیکستان با افغانستان شده‌اند.

خبرگزاری تاس نوشت که نشست بعدی اعضای این سازمان برای نهایی کردن پیش‌نویس تقویت مرز تاجیکستان با افغانستان در فوریه ۲۰۲۴ برگزار خواهد شد. 

اعضای سازمان پیمان امنیت جمعی در این نشست تقویت مرز تاجیکستان را از هدف‌های اعضای این سازمان دانستند.

سازمان پیمان امنیت جمعی متشکل از کشورهای روسیه، بلاروس، ارمنستان، قزاقستان، قرقیزستان، و تاجیکستان است.

از زمان تسلط طالبان در افغانستان، سازمان پیمان امنیت جمعی بارها از گسترش تروریسم به آسیای مرکزی ابراز نگرانی کرده است. این کشورها از روسیه می‌خواهند که نوار مرزی تاجیکستان با افغانستان را با حمایت نظامی تقویت کند تا جلوی ورود احتمالی تروریست‌ها گرفته شود.

در اوج نگرانی‌ها از گسترش فعالیت‌های تروریستی، تاجیکستان و روسیه در سال گذشته چند رزمایش مشترک در نزدیکی نوار مرزی افغانستان برگزار کردند. این رزمایش‌ها با هدف افزایش مهارت‌های نیروهای نظامی مستقر در مرز با افغانستان صورت گرفت. 

تاجیکستان از مخالفان رژیم طالبان در افغانستان است و به‌صراحت اعلام کرده است که هر نوع تماس و تعامل با این رژیم مشروط به تشکیل حکومت فراگیر با حضور همه اقوام ساکن افغانستان است. تاجیکستان سفارت افغانستان در شهر دوشنبه را به طالبان واگذار نکرده است. گفته می‌شود که برخی از اعضای جبهه مقاومت ملی به رهبری احمد مسعود و شماری دیگر از مخالفان طالبان در تاجیکستان مستقرند.  

القاعده، داعش، تحریک اسلامی ازبکستان، جماعت انصارالله، تحریک طالبان تاجیکستان، تحریک طالبان پاکستان، جیش محمد، سپاه صحابه، و شمار دیگری از گروه‌های تروریستی در افغانستان حضور دارند، اما طالبان فقط با شاخه خراسان دولت اسلامی (داعش) مبارزه کرده‌اند.

طالبان تاکید دارند که به هیچ فرد یا گروهی اجازه نمی‌دهند از خاک افغانستان علیه کشورهای دیگر استفاده کند.

برخی از کارشناسان نظامی معتقدند که طالبان در دوران حاکمیت بر افغانستان برای مبارزه با تهدیدهایی که علیه کشورهای منطقه می‌شود اقدامی نکرده‌اند و همین باعث افزایش نارضایتی از عملکرد طالبان در این کشورها شده است. 

اعضای سازمان پیمان امنیت جمعی در حالی از روسیه می‌خواهند که به تقویت مرزهای تاجیکستان با افغانستان اقدام کند که خود آن کشور با طالبان تعامل دارد.  

خبرگزاری تاس نوشت که تیموفی بویکوف، یکی از دیپلمات‌های وزارت خارجه روسیه، گفته است دولت روسیه معتقد است که طالبان شریکی برای مذاکره‌اند.

او گفت: «روسیه در حال توسعه روابط با دولت موقت در کابل است. ما معتقدیم که طالبان قادر به توافق‌اند و کنترل کامل اوضاع در افغانستان را در دست دارند. ما در حال برقراری روابط برابر با آن‌ها در راستای منافع خودمان هستیم.» 

گفتنی است که ضمیر کابلوف، نماینده ویژه رئیس‌جمهوری روسیه، به‌تازگی با سراج‌الدین حقانی، وزیر داخله (کشور) طالبان در کابل دیدار کرد.